பயன்பாட்டின் எச்சங்கள்
வழியெங்கும் -
பளீரென சுத்தமாயிருக்கிற
குப்பைத் தொட்டிக்கு
வெளியேயும், நடைபாதையெங்கும்!
புது முகங்களுக்கு மட்டும்
அறிமுகத்தில் எரிச்சலூட்டும்
கழிவுகள்!
பழகிய பின் யாரும்
முகம் சுளிப்பதேயில்லை.
நிலத்தடி நீரை
வீணே கடத்தி
யார்க்கும் உதவாது பண்ணும்
பாலீதின் குப்பைகள்.
பெருத்து, வீங்கி
மேடாகிப் போன
குப்பை மேடுகளிலிருந்து
காலராக்கள், மலேரியாகள்
இன்னும்
புது புது வியாதிகளை
பரப்பக் கிளம்பும்
கொசுக் கூட்டங்கள்.
ஒரு காலத்தில்
சுத்தமாய் இருந்ததாய்
யார் யாரோ பேசக் கேட்டதுண்டு.
சுத்தம் செய்ய
முனைப்புடன் எவரேனும்
துணிவதேயில்லை.
தெருக்கள், கிராமங்கள்,
நகரங்கள், மாநிலங்கள்,
தொகுதிகள், நாடு என
பயன்பாடின்றி
மினுக்கித் திரிகின்றன
குப்பைகள்.
