பயணம்

நெரிசல் மிகு சாலை,
நின்று நிதானித்து
நடை பயிலும் குறைமாத க(கா)ர்ப்பிணிகள்.
இடைவெளி நிரப்பியவாரே
புழுதி சுவாசிக்கும்
கால்நடை(வாசி)கள்.

ஓசோன் ஓட்டை,
காற்று வெளி பாழடைந்தது
பற்றியுமான விவாதங்களை
பாடல்களுக்கு இடை இடையே
கவனிப்பாரற்று
இரைந்து கொண்டிருக்கிற
வானொலிகள்.

நிரம்பி வழிந்த பணம்
போட்ட குட்டிகளாய்
பெரிய பெரிய அடுக்குமாடி
குடியிருப்புகள் -
வழியடைத்துக்கொண்டே நீள...

எதை நோக்கி
நகர்கிறேன் என்பது
எனக்கும் மட்டுமே
விளங்கவில்லை
என்பதாகவே  படுகிறது!!

ஒரு நதியின் புலம்பல்

உருத்தெரியாது சிதைந்து போன 

பழைய பாதை. 

சிறையிலிருந்து வெளிவரும் 

தருணங்களில்... 

வழிதோறுமான குழிகளில் 

விழுந்தெழுந்து நகர்ந்து  

மறுபடி முடமாகி திணறுகையில் -   

"அழையா விருந்தளியோ நான்"

என்கிற  வேதனையே மிகும்!