அந்திம காலம்

கூடடைய  விரித்த 

சிறகுகள்!

எதனுடன் கலந்தால் 

சாயம் மாறும் வானம்???

விடை தந்தவாரே 

வீடு  அடைகிற வேகம்!

இதுவும் கரைந்து 

கருமையாய் மாறும்!

உறைவதற்கில்லை, 

உணர்வதற்கே கடந்துபோகிறது ...

அந்திம காலங்கள்!

நன்றி : ஓவியம் - தன்யஸ்ரீ 

கண்ணாடி குளம்

கல்லெறிகிற
கலையில்
கரை கண்ட கைகள்!

எம்பிக் குதிக்கும்
தவளையாய்
உருமாறிய குதூகலம்!

உடைந்த சில்லுகளில்
நிறைந்து வழிகிறது
தொடுத்தவர் முகங்கள்!

ஒட்டவைக்கிற,
வெறித்து பார்க்கிற,
கடந்து போகிற
பார்வைகளாய்
பெருத்து  நிரம்பி வழியும்
எல்லா துண்டுகளிலும்
முன் நாட்களின்
குதூகலங்களே -
ஒன்று பன்மடங்காய்
சிதறல்கள்!!!

வண்ணங்கள் உள்ளெழுப்பும்
விசாரிப்புகளை
விவரிக்க தேடுகிறேன்
பிறந்த மொழி
அகராதியின் பக்கங்கள்!

இன்னுமும் விளங்காத
வாழ்க்கையின் அர்த்தங்களை
சொல்லுகிற - உன்
விரல், தூரிகை
பிடித்து நடந்தால்
கிடைத்திடுமோ!!!????



- நன்றி - தன்யஸ்ரீ 

தெய்வங்கள்

 கோயில்களின் நீண்ட பிரகாரங்களில்
நின்று  பிரார்தித்து
நடந்து போகிற தெய்வங்கள்!

தெய்வங்கள்
கருவறையில் நிரப்பிட்ட
விண்ணப்பங்களில்
பிள்ளைகள் பெயர்கள்!!

காய்கறி, பழங்கள்
நிறைந்து வழியும்
சந்தைகளில்
கவனமாய் தேர்ந்தெடுக்கிற
கைபட்டு சுவைகூடும்.
ஊட்டமும் குடி
பின் வீடு சேரும்!

உயிர் பெற்ற
நாள் முதல்
நீ
பார்த்து பார்த்து
வளர்ந்திட்ட உயிரிது!

உன் விரல்
செதுக்கி செதுக்கி
வெளிப்பட்ட
சிலையிது!

வருடம் ஒரு நாள்
வந்து போகும் நினைவல்ல!
அம்மா நீ
காற்று வருடும்
சுவாசம் போல
என்னுள் நிறைந்தவள்!

முதல் மொழி

முற்றும் புரியாத 

முதல் மொழி 

தமிழ்!

சுற்றிலும் சுற்றிய 

புன்னகை,

கண்கள் மொய்த்த 

பெரும் பார்வை.

இனிப்புகள் பரிமாற 

சந்தோச கூச்சலோடே 

கொஞ்சுதல் நிறைந்த 

புரியாத பிராயத்தே -

அஞ்சுதல் களைத்த 

முதல் மொழியும் 

தமிழ்!

தாலாட்டில், சீராட்டில்

எனை சுற்றி 

நிகழ்வுகளில்  

தூக்கி வளர்த்திட்டது 

தமிழ்!

வருடம் தோறும் 

நினைவு படுத்தும் 

நாட்களில் 

தமிழில் வரும் வாழ்த்துக்களில் 

மட்டுமே மணக்கிறது 

நான் பிறந்த வாசனை!!

Big shame

நான் படித்த அறிவியல் 

கூட்டு பிரார்த்தனை செய்கிற 

அறிவை கொடுத்திற்று.

தேடிச் சேர்த்த 

தகவல் ஏதும் 

ஒழுங்கற்று உதவுதலன்றி 

யார் யார் பின்னோ 

தயவு தேடி ஓடிற்று.

சிற்றிளம் பிஞ்சே 

உனை காக்க 

உதவிடாத 

திறன், பொருள், அதிகாரம் 

எல்லாம் குப்பையடா.

ஒட்டெதற்கு?

முடியாட்சி காலங்களில்
வழியில்லை!

வந்தவனை வாழ்த்திடனும்!
நொந்த நொடி
புலம்பிடலாம்! - அன்றி
வேறெதுவும் வழியில்லை!
பூட்டன், பூட்டி,
ஒட்டன், ஒட்டி காலமது!

குடியாட்சி நடக்கிறது.
தெளிவில்லை!

தேறியவனை பொறுத்திடனும்,
கூடி கூடி நொந்திடனும்!

உண்மை தெளிந்திடும்
உரமில்லா காரணத்தால்
இன்றேனும்  வழியில்லை!

ஒவ்வொரு ஓட்டையும்
சிறுக சிறுக சேர்த்தாலன்றி
விழுந்து விட்ட ஓட்டையை அடைக்க
வழியேயில்லை!