பயணம்

நெரிசல் மிகு சாலை,
நின்று நிதானித்து
நடை பயிலும் குறைமாத க(கா)ர்ப்பிணிகள்.
இடைவெளி நிரப்பியவாரே
புழுதி சுவாசிக்கும்
கால்நடை(வாசி)கள்.

ஓசோன் ஓட்டை,
காற்று வெளி பாழடைந்தது
பற்றியுமான விவாதங்களை
பாடல்களுக்கு இடை இடையே
கவனிப்பாரற்று
இரைந்து கொண்டிருக்கிற
வானொலிகள்.

நிரம்பி வழிந்த பணம்
போட்ட குட்டிகளாய்
பெரிய பெரிய அடுக்குமாடி
குடியிருப்புகள் -
வழியடைத்துக்கொண்டே நீள...

எதை நோக்கி
நகர்கிறேன் என்பது
எனக்கும் மட்டுமே
விளங்கவில்லை
என்பதாகவே  படுகிறது!!

ஒரு நதியின் புலம்பல்

உருத்தெரியாது சிதைந்து போன 

பழைய பாதை. 

சிறையிலிருந்து வெளிவரும் 

தருணங்களில்... 

வழிதோறுமான குழிகளில் 

விழுந்தெழுந்து நகர்ந்து  

மறுபடி முடமாகி திணறுகையில் -   

"அழையா விருந்தளியோ நான்"

என்கிற  வேதனையே மிகும்!

அங்குலமும் நகராது
முட்டி மோதி
வழுவறியாது
முடங்கிய வார்த்தைகள்
தடாலென பிரவாகமாகிறது
நீ விரும்பி கேட்டதும்!!

காயமே மெய்யடா

யார் யாரோ
காயப்படுத்திய கல்லொன்று
புகார் வாசிக்க
புறப்பட இருந்த
நிமிடத்தில்
கூடி வந்தது
பெருங்கூட்டம் -
கடவுளது உருவமென
கைகுவித்து!

கட்டமைத்த  பிம்பம்
உடையாதிருக்கவும்
உடைந்த சில்லுகள்
ஓட்ட வைப்பதிலுமே
நாம்  வாழாதிருக்கிறோம்!?

சரி எனப்படுவது

எது சரி?

நீளுகிற விவாதங்களில் 

வெற்றி பெற்றவர்களாக 

பிரகனப் படுத்திக் கொள்வதில் 

ஏக பெருமுயற்சி!

புது வித கோணங்களில் 

அணுகுவதாய் 

சொல்லிக் கொள்வதற்குப் பின்பும் 

விளம்பரமே 

பிரதானம்

மட்டம் தட்டுதல்,

ஒரு சேர குரலுயர்த்தல்,

கூட்டத்தோடு ஒத்து ஓதுதல்...

வெவ்வேறு விதமான 

அணுகு முறைகளில் 

எதோ ஒன்றைப் பிடித்து தான் 

நானும் கடந்து போகிறேன் -

அப்போதைக்கு 

சரியெனப் படுகிற 

தளங்களில்!

பிற்பாடான 

சுய தேடலில் தான் 

சமயங்களில் 

விழி பிதுங்க

நகர்கிறேன்!!

விளம்பரங்கள்
வான வேடிக்கை மாதிரி
அற்புதம் தான் -
ஆளாளுக்கு கொளுத்திப்போட்ட
நெடியில்
மூச்சு முட்டுகிற வரை!

காது கிழிய
நீட்டி முழக்குகிற
விளம்பர வாசிகளே
என்ன தான்
விற்க முற்படுகிறீர்கள்
என்பது
புரிபட தொடங்கி விட்டது!

வேறு சந்தை
பாருங்களேன்!!